***
Кил, әй башчы! Агачыңны юнма юкка,
Кирәк булмас, угыңны як, кил утка;
Ачып хәйрат белән гыйбрәт күзеңне,
Кара читләргә: туплар китте хутка!
***
Ничә багълар күңелләрдә төзелде,
Сары юллар булып гамьләр сызылды.
Өмидләр, кем, менеп башка тезелде,
Агарган кыл кебек, бер-бер өзелде.
***
Кил, и башчы! Агачны юнма юкка,
Кирәк булмас – угыңны як, кил, утка.
Агарды чәч,
Куарды баш,
Сары юллар сызылды.
Өмидләр, кем...
Өмидләр, кем...
Дәригъ, бер-бер өзелде!..
1912
Багълар — бакчалар
Гамләр — сагышлар
Куарды — агарды
Дәригъ — кызганыч
Аңлатма
«Шура» журналының 1912 ел 5 санында басыла. 1929 елгы басмасында ике өлешкә бүлеп бирелә.
